قصيدة تجسد بطل معركة الطف ابو الفظل العباس

ياهو الشاف عباس البطل مــــــن غار
بالطف والنواصب حالهــــــــــــــــــــم طشار
فارس والفراسه العنده اصلهــــه منين
جايبهه من ابــــــــــــــــــــــوه وجعفر الطيار
كافل زينب اسمه وهمه عالـــــــــو بيه
واخته الزهره جنهه وكربلـــــــــــه البسمار
ماظلت زلم ساواهه وي الكــــــــــــاع
مشدوهه الزلم موحكهه مـــــــــــــــن تحتار
كلشي ولاعلي وانوب اجـــــــه العباس
طبلهه وخبطهه ودوهــــــــــــــــــــــن الكفار
يحلفون بعلي يمكن علــــــــــي الخيال
صاعد على الغيمه وبيـــــــــــــــده ذو الفقار
حيدر هذا اجه؟؟اي حيدر اعله الغيم
بس ياهو الوراه عباس لوعمــــــــــــــــــــار
لاعباس ..يمكــــــــــن جايب العباس
لو كرار هذا وجايب الكــــــــــــــــــــــــــــرار

عباس البلطف لوحيدر

موكرار كالو يمكـــــــــــــــــــــــن العباس
بس يشبه علــــــــــــــــي والطاس نفس الطاس
فاطم اسم امــــــــــــه شلون خاف حسين
غير نموت كلنه لوطلــــــــــــــــــــــــــــع عباس
طراهم مثل؟؟بعد امــــــــــــــــي طرة ذيب
عباس وبعد بيمن بعـــــــــــــــــــــــــــــــد ينقاس
اول لونخيته او اسرع مـــــــــن الصوت
كاس الغيره هوه وهـــــــــــــــــــوه جاب الكاس
امعزب؟ لووكف..يكعد صـــــــــدر ديوان
سهمه من الخصـــــــــــــم معروف بس الراس
طبلهم مثل ماطب علــــــــــــــــي بصفين
واول ماخزرهـــــــــــــــــــــــم ناس ردمت ناس

يابويه عباس البلطف

اي عباس اكلك والدليل جفــــــــــــوف
ظلن عالشريعه يلولن اعلــــــــــــــــــه الخوف
العباس مغضب واسمــــه يضحك دوم
يركض للمنايه بواهس الملهــــــــــــــــــــــوف
والعباس عباس الشمس لــــــــــو كام
وين تروح زينب هوه يمهه يطـــــــــــــــــــوف
شحجيلك بعــــــــــــد عباس بس عباس
مثله يشيل اصبعه تطيـــــــــــــح حدره سيوف
غابه الكنطره وطبلهـــــــــه طبعا صار
سبع الكنطره وبالغابه ظــــــــــــــــــــل يحوف
ظل يجيب ويـــــــــن البيه تغص العين
ويصطره اعله عينه وعينه الاخـــــره تشوف
عد غيره الزلـــــــــــــم مبنيه للمجهول
بس عده الزلم مبنيه عالمكشــــــــــــــــــــوف
خط احمــــــــر عليه جان الفرات وراح
لوه خشم الفرات وجابـــــــــــــــه الك مجتوف

لو اذبحك لوترضي سكينه

سواهه وتنومس والسهام شهـــــــــود
لاذن بالعيون ورون مــــــــــــــــــــــــــن الجود
اخوزينب بعد واتصور انت شلـــــــــون
زينب من تندبه شلـــــــــــــــــــــون عنهه يذود
جائز لوكلت معناهه عدنه يجــــــــــوز
وعد عباس تعني بروحه الهه يجـــــــــــــــــود
يحسب بالزلم ظل عشره عشره اطباك
ويكلهم بعـــــــــــــــــــــد والعشره عشره تزود
يمته يعود لاخته انــــــــــــه اكلك عود
من تكظي الزلم لاخته بعكلهــــــــــــــــــه يعود
موياهو الاجه وكال انه بين غــــــــــــاد
بس عباس كال انه وطلع موجـــــــــــــــــــــود
هذا حسين كلهم وانه هذا اويـــــــــــــاه
ياهو العين بينه وياهو بينه ازنـــــــــــــــــــود
عباس الحســـــــــــن وحسين والعباس
رفعة روس اخوتـــــــــــــــه وسيفه بجه حيود
كلهه جفوف عدهه ومن وكف عباس
صار جفوف كله وكلهـــــــــــــــــــه بس خدود
حطهم بالسره واليفك حلكه اويـــــــاه
باليمنه اعله حلكه وفنه يحجـــــــــــــي اردود
اكباله الوكف مات وبيه بخت من مات
واليشرد يجتفه وبيه يـــــــــــــــــــــــرد مكيود
راس الموت جابه وغاد ذب المــــوت
كله الراس اليه وانت حك الــــــــــــــــــــــدود

كص راس الموت وشال ايده